“...Deyirlər xaricdə bir əjdaha peyda olub. Özü də suda yaşayır və hər kəsi yeyir. Axı, o əjdahadan xaricdə varsa bizdə niyə olmasın?...”
Yəqin xatırladınız. Bu sitat “Bəyin oğurlanması” filmindən məşhur kəlamdır. “Qonşudan qalma dala” prinisipini əsas götürərək tərəqqi, yenilik adı altında hər keyfiyyəti əldə etməyə çalışanların bariz nümunəsidir bu obraz. Fərq etməz, bu keyfiyyət yaxşı olsun, ya da pis, xeyrimizə olsun, ya ziyanımıza. Milli mentalitetimizə, dini dəyərlərimizə zidd olsa belə problem deyil. Əsas odur ki, “importnı” olsun, xaricdən gəlsin.

2012-ci il may ayında Bakıda “Eurovision-2012” keçiriləcək.  Azərbaycan var gücü ilə bu müsabiqədə iştirak edəcək qonaqları ən yüksək səviyyədə qəbul etmək üçün çalışır. 2009-ci ildə “İslam Mədəniyyətinin Paytaxtı” seçilmiş Bakı 3 il sonra homoseksualları qarşılamağa hazırlaşır. Bəli, əhalisinin 97% müsəlman olan Azərbaycanda “gey-parad” keçiriləcək. Iyirmi min Gey doğma Bakımızın mərkəzi meydanlarında, qız-gəlinlərimizin, övladlarımızın gözü önündən keçərək “qürur günü”nü qeyd edəcəklər. Və beləliklə də, dünya ictimaiyyətinin diqqətini homoseksualların “hüquqlarının müdafiəsinə” yönəldəcəklər. Bir vaxtlar suverenliyimiz, müstəqilliyimiz uğrunda canlarını belə fəda etməkdən çəkinməyən, əliyalın Sovet tankları qarşısında sipər olan qeyrətli oğulların keçdiyi küçələrdə, şəhidlərimizin qanlarının axdığı meydanlarda indi homoseksuallar parad keçirərək “hüquqlarını müdafiə edəcəklər”.

“Eurovision-2011”-in qalibi Eldar Qasımovun jurnalistlərin homoseksualların Azərbaycana gəlişinin necə qarşılanacağı barəsindəki suallara cavabını xatırlatmaq yerinə düşərdi: “Azərbaycan tolerant ölkə olduğunu, ənənələrə sadiq qalsa da hər kəsə, hamıya tolerant münasibət göstərəcəyini bildirir”.    
Bəli, Azərbaycan 20% torpağı işğal, 1 milyondan çox məcburi köçkünü olsa da, müsafirlərini ən yüksək səviyyədə qarşılamağa qadir olan qonaqpərvər bir ölkədir. Milli-mənəvi dəyərlərini tapdayan, adət-ənənələrini ayaqlar altına salan “qonaqlara” belə, “Bu torpaqda, bu millətin qeyrətinə, namusuna zidd olan hərəkətlər edilməz” deyə bilməyəcək qədər ürəyiyumşaqdır. Öz doğma övladlarının bir ildən çox dini inancına uyğun yaşamaq istəyi, başörtüsü ilə məktəbə buraxılmamasına baxmayaraq, dünyada “vicdan azadlığı” pozulan, dünya ictimaiyyəti tərəfindən “haqqı tapdanan” homoseksualları təsəlli edəcək qədər tolerant bir ölkədir. Bəli, Azərbaycan vətəndaşının işsizlik, aclıq, məişət problemlərini bir kənara qoyaraq “Eurovision-2012” üçün 200 milyondan çox pul xərcləyəcək qədər səxavətlidir. Təhsili, mədəniyyəti korrupsiya bataqlığında can verən bu ölkə “Eurovision” kimi mahnı müsabiqələrinə ev sahibliyi edəcək səviyyədə tərəqqipərvərdir.
Azərbaycan hökuməti may ayında ziyalısından tutmuş sadə vətəndaşına kimi xalqın bütün kəsimlərinin bu üzdəniraqların ölkəyə gəlişinə etiraz etməsinə məhəl qoymayaraq “axı o əjdahadan niyə bizdə olmasın” prinsipi ilə “Eurovision-2012” keçirəcək. Allah axırımızı xeyir etsin!